Aka um Ís­land í allt sumar og mynda vega­kerfið í þrí­vídd

Þetta kemur fram í tilkynningu frá fyrirtækinu sem er að mestu í eigu bílaframleiðendanna Audi, BMW Group og Mercedes‑Benz Group. HERE Tecnologies safnar nákvæmum vegagögnum og víðmyndum af vegsamgöngukerfi fjölmargra landa um allan heim í því skyni að búa til fullkomin stafræn öku- og leiðsögukort.

Fólksbílum á vegum HERE verður á tímabilinu maí til og með ágúst ekið eftir þjóðvegum, stofnvegum og götum landsins til að kortleggja stærstan hluta íslenska vegakerfisins með þrívíddartækni. Þannig safna bílarnir mjög nákvæmum upplýsingum á leið sinni, þar á meðal akreinamerkingum og skiltum. Bílarnir, sem eru merktir HERE, munu einnig taka þrívíðar myndir og götumyndir, auk mynda af tilteknum stöðum á borð við verslanir, bensínstöðvar og veitingastaði.

„HERE notar háþróuðustu tækni sem völ er á til gagnasöfnunarinnar og úrvinnslu upplýsinganna á sama tíma og þess er gætt í hvívetna að virða og vernda friðhelgi einkalífs almennings,“ segir í tilkynningunni. 

„Upplýsingarnar verða notaðar við gerð ítarlegra korta af Íslandi, sem hönnuð verða til að styðja m.a. við akstur sjálfkeyrandi ökutækja og aðra háþróaða þjónustu sem bætt getur umferðaröryggi, dregið úr umferðarteppum og gert fólki kleift að komast með sem greiðustum hætti milli áfangastaða í þéttbýli.“

Næstu vikurnar verður bílum HERE ekið alla helstu aðalvegi og stofnbrautir landsins auk gatna á helstu þéttbýlisstöðum.

HERE er skuldbundið til að virða og vernda friðhelgi einkalífs almennings. 

„Safnað myndefni geymist til að byrja með í ökutækjunum en verður síðan flutt dulkóðað á öruggan geymslustað á vegum fyrirtækisins. Þar verða gögnin unnin með háþróuðum hugbúnaðarkerfum og algórisma til að greina og hylja andlit og bílnúmer. Myndir verða aðeins birtar eftir að andlit og bílnúmer hafa verið þokuð.“

HERE Techonologies var upphaflega stofnað 1985 sem Navteq í Bandaríkjunum, síðar keypt af finnska fyrirtækinu Nokia árið 2007 fyrir um 8,1 milljarð dala. Árið 2015 keyptu Audi, BMW og Daimler (nú Mercedes‑Benz Group) HERE fyrir um 2,8 milljarða evra.