Segja Freddie Mercury eiga laun­dóttur

Þetta kemur fram í frétt Daily mail um málið.

Freddie Mercury, sem var söngvari hljómsveitarinnar Queen, er sagður hafa verið í góðum samskiptum við dótturina meðan hann lifði. Sagt er afar fáir hafi vitað af henni undanfarin fimmtíu ár, aðeins vinir hans í hljómsveitinni og Mary Austin kærasta hans.

Sagt er að hún hafi verið getin árið 1976 þegar hann hélt við konu vinar síns.

Nýja ævisagan um Freddie hefur að geyma viðtal við dótturina, sem í dag er 48 ára og býr í Evrópu. Hún kýs að halda nafnleynd.

„Freddie Mercury var og er faðir minn. Við áttum í góðum samskiptum alla hans ævi alveg frá því ég fæddist,“ sagði hún.

„Hann dýrkaði mig og lagði sig fram við að sinna mér. Kringumstæðurnar við fæðinguna mína voru ekki eins og hjá flestum og sumum þættu þær jafnvel óviðeigandi. Það kom aldrei í veg fyrir að hann sæi sér fært um að elska mig og sinna mér,“ sagði hún um föður sinn.

Hún heldur því fram að Mercury hafi reglulega heimsótt hana, og að hún hafi alltaf vitað að hann væri raunverulegur faðir hennar.

Höfundur ævisögunnar segir að hún hafi dregið frásögnina verulega í efa fyrst um sinn, en hún sé fullviss um það í dag að konan sé ekki að ljúga.

„Hún hefur aldrei beðið um peninga, hún er ekki að biðja um einhverja viðurkenningu. Hún erfði bæði Freddie og stjúpföður sinn. Hún var ekki með í erfðaskrá Freddie, en hann sá til þess að hún fengi sinn skerf með öðrum leynilegum samningum,“ sagði hún.

Mercury lést árið 1991 en hann hafði glímt við alnæmi.