Oscar hafi veitt tak­mörkuð svör

Í úrskurði kærunefndar útlendingamála þar sem umsókn hins sautján ára gamla Oscars um landvistarleyfi er hafnað, segir meðal annars að strákurinn eigi fjölskyldu í heimalandi sínu Kólumbíu og að þar sé til staðar félagslegt kerfi auk barnaverndarkerfis. Ljóst sé að honum verði veitt móttaka barnaverndaryfirvalda og ekki sé sýnt fram á að drengurinn sæti ofsóknum í heimalandinu. 

Segir að Oscar hafi auk þess tjáð sig að takmörkuðu leyfi um aðstæður sínar í Kólumbíu. Segir í úrskurðinum að hann hafi óskað eftir því að gögn úr viðtali hans við barnaverndarþjónustu Suðurnesjabæja þar sem hann lýsi ofbeldi í sinn garð yrðu ekki lögð fram við afgreiðslu málsins. Standi ákvörðunin verður drengnum vísað úr landi í byrjun júní. Svavar Jóhannsson og Sonja Magnúsdóttir fósturforeldrar Oscars ræddu mál hans í Bítinu í morgun og segja að síðustu daga hafa verið mikla rússíbanareið.

„Síðasta vika var eiginlega svart og hvítt. Við fengum fyrst fréttir frá Barnavernd Suðurnesja að þeir legðu til að Oscar fengi vernd og að þeir teldu enganveginn óhætt að senda hann til Kólumbíu aftur, við héldum að það myndi nú trompa flestallar aðrar ákvarðanir en nei nei Kærunefnd Útlendingamála virti þessa ákvörðun Barnaverndar algjörlega að vettugi og sagði bara jú jú við ætlum samt að senda hann út og nú er kominn lokaákvörðun, lokaúrskurður Kærunefndar Útlendingamála og það á semsagt að senda Oscar einan út.“

Þau Sonja og Svavar segja ráðamenn engin svör hafa gefið en Guðmundur Ingi Kristinsson mennta- og barnamálaráðherra hefur ekki gefið fréttastofu kost á viðtali vegna málsins í dag, þar sem hann sé staddur í útlöndum.

„Okkur líður pínu þannig að það séu einhverjir embættismenn sem eru bara fúlir að hann sé kominn hingað aftur og að þeir ætli ekki að gefa sig í því að samþykkja hann á Íslandi. Eins og þeir hafi tapað málinu? Já eins og þetta sé þeirra persónulega tap að hann hafi komist hingað aftur og sé aftur orðinn vandamál fyrir Útlendingastofnun af því að það eru engin rök sem hníga til þess að lofa honum ekki að vera hérna, við erum tilbúin að hafa hann, það er enginn tilkostnaður.“