Greip í hár mót­herja og kippti til og frá

Fischer var nýbúin að leggja upp mark fyrir Racing Louisville og koma liðinu í 3-1 gegn Angel City, í bandarísku úrvalsdeildinni, þegar hún greip um hár Madison Hammond og togaði hana til og frá þannig að hún kastaðist í jörðina. Atvikið má sjá hér að neðan.

Boltinn var hvergi nálægur þegar Fischer beitti Hammond þessu ofbeldi en eftir skoðun á myndbandi sýndi dómarinn henni rautt spjald auk þess að dæma vítaspyrnu.

Alyssa Thompson skoraði úr vítinu og minnkaði muninn í 3-2 en þrátt fyrir liðsmuninn voru ekki fleiri mörk skoruð og Racing fagnaði sigri. Liðin eru þar með jöfn að stigum í 7.-8. sæti.

Samkvæmt frétt USA Today fær Fischer sjálfkrafa eins leiks bann en má eiga von á lengra banni eftir skoðun aganefndar.

Leikurinn um helgina var sá fyrsti sem Angel City spilar eftir að félagið tilkynnti að það hefði samið við Sveindísi. Hún er hins vegar ekki komin með leikheimild og spilar ekki með liðinu fyrr en eftir landsleikina mikilvægu sem Ísland spilar á næstunni, við Noreg 30. maí og Frakkland 3. júní.