Segir Viðskiptablaðið og Samstöðina fara rangt með mál um Ást­hildi Lóu

Heimir Már Pétursson, framkvæmdastjóri þingflokks og upplýsingafulltrúi Flokks fólksins, greindi frá þessu í hæðnislegri Facebook-færslu síðdegis í gær þar sem hann líkir Viðskiptablaðinu við Alþýðublaðið.

„Eins og allir sem fylgjast sæmilega vel með vita er Viðskiptablaðið helsta brjóstvörn og málgagn alþýðu landsins og einlægur stuðningsmaður ríkisrekins sjónvarps og útvarps. Einhvers konar nýtt Alþýðublað og má vart sjá hver ber hag alþýðu meira fyrir brjósti Viðskiptaráð eða Viðskiptablaðið. Þessi umhyggja nýja Alþýðublaðsins kemur meðal annars fram í hjartfólgnum pistli á vef þess í dag sem enginn er skrifaður fyrir,“ skrifar Heimir í færslunni.

„En hvernig var þetta í raunveruleikanum?“

Heimir birtar síðan tvo texta úr ritstjórnardálki Hugins og Munins á Viðskiptablaðinu frá því í gær.

Annars vegar þar sem segir að Magnús Geir Eyjólfsson fréttamaður hefði upplýst um að Ásthildur Lóa hefði „tekið þá ákvörðun að ræða ekki framar við Ríkisútvarpið“ og hins vegar þar sem segir að ákvörðun Ásthildar sé „vafalaust tekin eftir samráð við Heimi Má Pétursson, aðstoðarráðherra og upplýsingafulltrúa flokksins, en hann situr einnig í stjórn RÚV“.

„En hvernig var þetta í raunveruleikanum?“ spyr Heimir í færslunni. 

Hann rekur síðan það sem Magnús Geir sagði í kvöldfréttum Rúv 26. maí sem var: „Við óskuðum nú eftir viðtali við Ásthildi Lóu í dag en hún sagðist ekki ætla að tala við fréttastofu RÚV.“

Að sögn Heimis hafi Ásthildur Lóa neitað Magnúsi um viðtal fyrr um daginn vegna þeirra tímamóta að hún væri aftur mætt til þingstarfa.

„Þarna var ekkert fullyrt um að Ásta Lóa ætlaði aldrei framar að ræða við RÚV, enda gerði hún það ekki. Bara sagt að í dag hafi þingmaður sagt að hún ætlaði ekki að tala við fréttastofu RÚV,“ skrifar Heimir í færslunni.

Rangt haft eftir fréttamanni og sannleiksgildis ekki leitað

Heimir tekur síðan fyrir skoðanapistilinn „Getur þingmaður skellt á fréttastofu Rúv?“ sem Björn Þorláksson, blaðamaður og fyrrverandi frambjóðandi Flokks fólksins, skrifaði á Samstöðina um ákvörðun Ásthildar Lóu að neita viðtali. 

Skrifum Björns lýsir Heimir sem „hástemmdum pistli“ um hlutverk Rúv og fjölmiðla sem hornstein lýðræðis og hugleiðingum um það hvort Ásta Lóa geti leyft sér að „skella á RÚV“.

„Nú hefði verið mun betra ef ónafngreindur pistlahöfundur nýja Alþýðublaðsins og blaðamaður nýja Þjóðviljans hefðu í fyrsta lagi haft rétt eftir Magnúsi Geir félaga sínum í Blaðamannafélaginu. Og í öðru lagi að þeir hefðu leitað sannleiksgildis fullyrðingarinnar um að „Ásthildur Lóa ætlaði aldrei framar að tala við RÚV,“ hjá henni áður en þeir riðu fram ritvöllinn fullir vandlætingar,“ skrifar Heimir í færslunni.

„En hver þarf á góðum heimildum að halda þegar dugar að vitna bara hvor í annan, burt séð frá allri nákvæmni? Allt sem fjölmiðlar segja er jú rétt og satt,“ skrifar hann jafnframt.

„Eftir stendur að Ásthildur Lóa hefur aldrei sagt að hún muni aldrei framar ræða við fréttamenn RÚV, þótt hún hafi ekki verið uppveðruð til að gera það á fyrsta degi eftir að hún sneri aftur til þings eftir þann storm sem RÚV átti upphafið af fyrir tveimur mánuðum. Svo einfalt er það,“ skrifar Heimir að lokum.

„Hafa skal það sem sannara reynist“

Ásthildur Lóa Þórsdóttir, þingmaður Flokks fólksins, deilir færslu Heimis Más og skrifar við hana „Fjöðrin sem er að breytast í hænu(r)“. Hún tekur þar undir orð Heimis og skrifar jafnframt: „Hafa skal það sem sannara reynist“.

Einnig deilir Kolbrún Áslaugar Baldursdóttir, þingmaður Flokks fólksins, færslunni sem og Facebook-síða Hagsmunasamtaka heimilanna sem Ásthildur Lóa var í forsvari fyrir um árabil áður en hún varð ráðherra.

Þess ber að geta að Björn Þorláksson uppfærði skoðanapistil sinn í gær eftir að búið var að hrekja fullyrðingar Viðskiptablaðsins. Nú stendur neðst í pistlinum: 

„Samkvæmt upplýsingum frá Flokki fólksins er frásögn Viðskiptablaðsins sem stuðst var við sem heimild ekki nákvæm og er samkvæmt fulltrúum Flokks fólksins ofmælt að Ásta Lóa hafi sagt að hún hygðist aldrei síðar ræða við fréttastofu Rúv.“

Ritstjórnardálkur Viðskiptablaðsins hefur hins vegar ekki verið uppfærður.