Hamas svarar vopnahléstillögunni sem Ísraelar hafa sam­þykkt

Þrátt fyrir að Hamas hafi svarað tillögunni hafa þeir ekki ákveðið hver afstaða þeirra er. Hins vegar samþykktu þeir að frelsa tíu gísla í þeirra haldi og afhenda jarðneskar leyfar átján gísla. 

Einnig sögðust þeir vilja varanlegt vopnahlé, að allir Ísraelar yfirgefi Gasaströndina og loforð um óheft aðgengi mannúðaraðstoðar. Ekkert af þessum atriðum er í núverandi tilboðinu samkvæmt umfjöllun BBC.

Talið óvíst að Hamas samþykki tilboðið

Donald Trump, Bandaríkjaforseti, og Steve Witkoff, sérstakur erindreki forsetans í Miðausturlöndunum, lögðu tillöguna fram fyrir fulltrúa Ísraels sem samþykktu hana á fimmtudag. Þá var tillagan afhent Hamas liðum til skoðunar.

Hún felst í því að Hamas frelsi tíu lifandi gísla og jarðneskar leyfar átján gísla auk sextíu daga vopnahlés. Gegn frelsun gíslanna verður palestínskum föngum Ísraela sleppt úr haldi.

Á föstudag hafði BBC eftir háttsettum Hamas-liða að samtökin séu líkleg til að hafna tillögunni að vopnahléi þar sem tillagan uppfylli ekki grundvallarskilyrði þeirra. 

Átökin milli Hamas á Gasaströndinni og Ísraela hófust 7. október 2023 þegar Hamas gerðu árás á tónlistarhátíð í Ísrael þar sem tólf hundruð manns voru drepnir. Í átökunum hafa yfir fimmtíu þúsund Palestínubúa verið drepnir.