Veður

Grjót­hrun á Siglu­fjarðar­vegi og skriðu­fall í Nes­kaup­stað

Lovísa Arnardóttir skrifar
Lítil skriða féll í Neskaupstað. 
Lítil skriða féll í Neskaupstað.  Vísir/Vilhelm

Veðurstofan hefur gefið út viðvörun vegna skriðuhættu og vatnavaxta á norðan- og austanverðu landinu. Grjóthrun varð á Siglufjarðarvegi í kvöld og lítil skriða féll í Neskaupstað. Enn er gul viðvörun í gangi á stórum hluta landsins.

Samkvæmt upplýsingum frá veðurfræðingi Veðurstofunnar mun rigna áfram á Austfjörðumí nótt en rigningin minnkar á morgun. Mesta úrkoman mun falla á Tröllaskaga og Flateyjarskaga.

Í tilkynningu ofanflóðavaktar Veðurstofunnar um skriðuhættu segir að í gera megi ráð fyrir mikilli rigningu nyrst á Tröllaskaga og Flateyjarskaga í dag og fram á helgi, en að aðfaranótt fimmtudags muni draga eitthvað úr ákefðinni.

Eins megi búast við talsverðri úrkomu á Skaga, Vatnsnesi, Ströndum og á Tjörnesi næstu sólarhringa. Á þessum slóðum verður hætta á skriðuföllum og vatnavöxtum næstu daga, og hefur verið gefin út úrkomuviðvörun fyrir þessi svæði. Skriðuviðvörun er því í gildi fyrir norðanvert landið, frá Ströndum að Glettingi.

Þá segir í tilkynningunni að á norðanverðum Austfjörðum megi búast við úrkomu. Hún verði mest í grennd við Vopnafjörð, Borgarfjörð eystri og Mjóafjörð. Spáin geri ráð fyrir minni úrkomu á Seyðisfirði og Eskifirði, en þó megi búast við þónokkurri úrkomu á þeim slóðum.

Í tilkynningunni segir einnig að í miklum vatnsveðrum geti verið erfitt að spá fyrir um staðbundna úrkomu í flóknu fjarðarlandslagi, og því geti verið erfitt að meta hvar skriðuhættan sé mest. Snöggar breytingar í hitastigi og vindátt geti valdið því að aðstæður breytast snögglega, og hætta getur skapast á ólíklegum stöðum.




Fleiri fréttir

Sjá meira


×