Tók við verð­launum merktur Aroni sem var veikur heima

Óhætt er að segja að Aron hafi misst af því sem hefði átt að vera ein hans stærsta stund á handboltaferlinum. Oddaleikur um ungverska meistaratitilinn, og það sem stærra er, lokaleikurinn á glæstum handboltaferli Arons.

Örlögin réðu því hins vegar að Aron gat ekki verið með í dag. Aron var veikur og gat því ekki tekið þátt í leiknum, né verið viðstaddur til að taka við verðlaununum eftir að titillinn var í höfn.

Máltækið „ber er hver að baki nema sér bróður eigi“ á þó líklega vel við eftir þennan leik því Bjarki Már Elísson, liðsfélagi og herbergisfélagi Arons í íslenska landsliðinu, leikur einnig með Veszprém. Bjarki var að vísu utan hóps í oddaleiknum í dag, en var að sjálfsögðu viðstaddur á verðlaunaafhendingunni.

Þegar nafn Arons var kallað upp var Bjarki fljótur að mæta á svæðið og taka við verðlaununum fyrir félaga sinn, klæddur í treyju númer 44, merkt „Palmarsson“.

Það má því gera ráð fyrir því að Bjarki komi medalíunni til skila næst þegar þeir félagar hittast, en myndbrot af Bjarka taka við verðlaununum má sjá hér fyrir neðan. Myndefnið er frá Livey.