Allt klárt og Frank verður næsti stjóri Tottenham

Þetta fullyrðir félagaskiptafréttamaðurinn Fabrizio Romano nú í morgunsárið og segir allt klappað og klárt.

Tottenham hafi náð samkomulagi við Frank um samning sem og um hvaða teymi verði honum til fulltingis. Þá muni Brentford, sem Frank hefur stýrt síðustu sjö ár, fá tíu milljónir punda frá Tottenham eða jafnvirði um 1,7 milljarðs króna.

Postecoglou var rekinn þrátt fyrir að Tottenham næði að vinna sinn fyrsta titil í sautján ár á seinna tímabili liðsins undir hans stjórn. Liðið átti skelfilega leiktíð í ensku úrvalsdeildinni og endaði þar í 17. sæti en Brentford, undir stjórn Franks, endaði í 10. sæti þrátt fyrir að hafa selt stjörnuframherjann Ivan Toney fyrir tímabilið.

Thomas Frank tók við Brentford haustið 2018 þegar liðið sat um miðja næstefstu deild. Undir hans stjórn fór liðið tvisvar í úrslitaleik upp á sæti í ensku úrvalsdeildinni og vann í seinna skiptið, árið 2021. Brentford náði sínum besta árangri á nýliðinni leiktíð og daðraði lengi vel við Evrópubaráttu.

Samkvæmt The Telegraph voru leikmenn Tottenham margir afar ósáttir við að Postecoglou skyldi vera rekinn og spurning hvernig þeir taka nýjum stjóra sem nú er orðið ljóst að verður Frank.