Tjaldsungi klaktist út eftir tæpar tvær vikur á ofninum

Jóhanna Bjarndís Sævarsdóttir íbúi á Patreksfirði var á göngu með hundinum Rocky á Þúfneyri nærri Patreksfirði þegar hundurinn hnaut um óþekktan hlut. 

Hlaupa saman um gólfið

„Ég hélt að hann væri búinn að finna fiskhaus sem er mjög algengt á þessum stað, en þá var hann búinn að finna þetta egg,“ segir Jóhanna í samtali við fréttastofu.

„Ég sá ekkert í kring, engan tjald. Það voru bara mávar. Ég fann að eggið var volgt og ákvað að taka það. Það var vont veður og alveg að koma kuldakast.“

Hún hafi farið heim með það á Patreksfjörð og komið því fyrir á ofni heima hjá sér. Tæplega tveimur vikum síðar fór svo að draga til tíðinda. 

„Allt í einu kom ungi, hann Kenny. Hann er algjör dásemd. Hann hleypur um gólfið með hundinum og fær að fara með okkur út, það er ekkert mál.“ segir Jóhanna, sem bjóst ekki við að eggið myndi klekjast út. 

Í ágúst hyggst Jóhanna láta á það reyna að koma fuglinum út úr húsi og sjá hvernig hann spjarar sig. Ef hann gerir það ekki segist hún viðbúin að gera Kenny að fjölskyldumeðlimi til langs tíma. Hún fékk þær upplýsingar frá Náttúrustofu Vestfjarða að umrædd tegund geti orðið allt að 35 ára gömul.

Ekki virðist væsa um Kenny sem fær að sögn Jóhönnu mjölorma og ánamaðka að éta. Þá nýtur hann félagsskapar hundsins á heimilinu.