Sil­ke­borg til Akur­eyrar og leið Vals, Víkings og Breiða­bliks ljósari

KA fékk undanþágu frá UEFA til að spila heimaleik sinn á Greifavellinum og því er ljóst að Silkeborg, silfurlið dönsku bikarkeppninnar, mætir norður á heimavöll íslensku bikarmeistaranna. Fyrri leikur liðanna verður í Danmörku 24. júlí en sá seinni á Akureyri 31. júlí en 2. umferðin er spiluð á þessum dögum.

Valur til Litháens eða Wales?

Valur og Víkingur leika fyrst í 1. umferð undankeppni Sambandsdeildarinnar en nú er einnig ljóst hvaða lið gætu beðið þeirra í 2. umferðinni.

Valur mætir Flora Tallinn frá Eistlandi í fyrstu umferð og mun sigurliðið svo mæta Kauno Zalgiris frá Litháen eða Penybont frá Wales.

Víkingar til Albaníu eða Lettlands?

Víkingur mætir Malisheva frá Kósovó í fyrstu umferð og svo vonandi Vllaznia frá Albaníu eða Daugavpils frá Lettlandi.

Íslandsmeistarar Breiðabliks gætu svo mögulega orðið fjórða íslenska liðið í 2. umferð undankeppni Sambandsdeildarinnar. Það gerist ef að Blikar falla úr leik gegn albanska liðinu Egnatia í fyrstu umferð undankeppni Meistaradeildarinnar.

Blikar myndu þá mæta annað hvort Ludogorets frá Búlgaríu eða Dinamo Minsk frá Hvíta-Rússlandi.

Ef að Breiðablik hins vegar vinnur Egnatia þá mun liðið halda áfram í undankeppni Meistaradeildarinnar og mæta þar pólsku meisturunum í Lech Poznan.