For­eldrar Wirtz fá 1,4 milljarða vegna kaupa Liverpool

Þýski landsliðsmaðurinn var staðfestur sem nýr leikmaður Liverpool á föstudaginn og er dýrasti leikmaðurinn í sögu Englandsmeistaranna.

Wirtz skrifaði undir fimm ára samning og fær samkvæmt heimildum Sky Sports 195 þúsund pund á viku í grunnlaun eða um 33 milljónir íslenskra króna. Hann getur auk þess hækkað launin sín talsvert með bónusum og gæti endað á því að fá þrettán milljónir punda á ári eða yfir tvo milljarða króna.

Wirtz verður þriðji launahæsti leikmaðurinn hjá Liverpool á eftir Mohamed Salah og Virgil van Dijk.

Það er þó ekki aðeins leikmaðurinn sjálfur sem græðir mikið á þessum félagsskiptum hans.

Málið er að foreldrar hans, Hans-Joachim og Karin, eru umboðsmenn stráksins. Hans-Joachim er einnig stjórnarformaður þýska félagsins Grün-Weiß Brauweiler, þar sem ferill stráksins hófst.

Talið er að foreldrar Wirtz fá tíu miljónir evra í eigin vasa vegna félagsskiptanna eða meira 1,4 milljarða króna. Bild sagði frá.

Þau hafa fylgt honum allan ferilinn og hafa aldrei leyft utanaðkomandi umboðsmanni að skipta sér af.

Fjölskylda Florian Wirtz er reyndar mjög stór því hann á níu systkini, fjóra bræður og fimm systur. Hann er fæddur árið 2003 og er sá yngsti í hópnum. Faðir hans er kominn yfir sjötugt en móðir hans er aðeins yngri.