Eng­lendingar Evrópu­meistarar eftir fram­lengdan leik

Englendingar komust yfir strax á 5. mínútu með marki frá Harvey Elliott, leikmanni Liverpool, sem var einmitt hetja liðsins í undanúrslitunum. Omari Hutchinson, leikmaður Ipswich, kom Englandi svo í 2-0 á 24. mínútu en þá blésu þýskir til sóknar og Nelson Weiper minnkaði muninn í 2-1 í uppbótartíma fyrri hálfleiks.

Paul Nebel jafnaði metin á 61. mínútu en þeir félagar eru báðir leikmenn FSV Mainz. Leikurinn róaðist nokkuð í kjölfarið þó Englendingar hafi verið líklegri til að tryggja sér sigurinn.

Því þurfti að grípa til framlengingar og kom sigurmarkið strax á 92. mínútu þegar Jonathan Rowe skallaði boltann í markið, sem var sennilega hans fyrsta snerting í leiknum. Þjóðverjar reyndu hvað þeir gátu til að jafna metin en Englendingar vörðust vel og sóttu hratt upp úr skyndisóknum og lönduðu að lokum sigri.

Þetta er í fjórða sinn sem Englendingar fagna sigri á EM U21 árs landsliða, og þá er þetta jafnframt í annað sinn sem þeir vinna tvö mót í röð.