Víkingar krækja í Óskar Borgþórs frá Sogndal

Víkingar greina frá tíðindunum á samfélagsmiðlum sínum og heimasíðu sinni, þar sem kemur fram að Óskar skrifi undir samning til ársins 2028.

Óskar hefur leikið með Sogndal frá árinu 2023, en áður lék hann með uppeldisfélagi sínu, Fylki. Hann á að baki níu leiki með U-21 árs landsliði Íslands þar sem hann hefur skorað eitt mark.

„Óskar er leikinn kantmaður með mikinn kraft og áræðni. Hann er leikinn, með frábæran skotfót og getur leyst fleiri stöður á vellinum. Óskar er gríðarlega spennandi leikmaður og við búumst við miklu af honum,“ segir Kári Árnason, yfirmaður knattspyrnumála hjá Víkingi, meðal annars um félagsskiptin.

Víkingar höfðu einnig áhuga á að fá Óskar í sínar raðir fyrir tímabilið, en fyrirspurn þeirra var þá hafnað af Sogndal. Hann verður gjaldgengur með liðinu þegar sumarglugginn opnar þann 17. júlí næstkomandi.