Opin­berar gamalt ástar­sam­band við táningsstúlku

Karl Héðinn greindi frá þessu í Facebook-færslu fyrr í kvöld. Hann segist aldrei hafa rætt málið við neinn utan Ungra Pírata á sínum tíma nema við fjölskyldu og vini.

Hann hafi ákveðið að greina frá sambandinu því Gunnar Smári Egilsson, fyrrverandi framkvæmdastjóri Sósíalistaflokksins, hafi ýjað að málinu opinberlega og krafið sig um svör. Því vilji hann segja skýrt og rétt frá.

Kynntust í sumarbúðum Pírata

„Þegar ég var 22 ára, árið 2017, var ég í sumarbúðum Pírata í Evrópu í Svíþjóð þar sem ungliðar víðast hvar úr Evrópu hittust. Þar kynntist ég stelpu frá Austurríki sem var þá 16 ára og við féllum hvor fyrir öðru,“ segir Karl. 

Hann segist enn vera góður vinur stelpunnar og þau hafi síðast talað saman í dag vegna „stöðunnar sem er uppi“. 

„Fyrir nokkrum árum spurði ég hana hvort, eftir á, hún hefði haft slæma upplifun af kynnum okkar og hvort hún sæi eftir þeim. Hún fullvissaði mig um að svo væri ekki, að hún sæi ekki eftir neinu og þakkaði mér fyrir að spyrja. Hún sagði það sama áðan,“ segir hann.

Þá segir Karl að Dóra Björt Guðjónsdóttir, sem var þá formaður Ungra Pírata, hafi beðið hann um að segja sig frá stjórn Ungra Pírata vegna málsins. Hann hafi ekki viljað valda flokknum skaða og orðið við beininni „án nokkurs múðurs“.

Sjá einnig: Vísar ásökunum um smölun aftur til sendanda

Sósíalistaflokkurinn hefur logað stafnanna á milli undanfarna mánuði vegna klofnings í flokknum og hallarbyltingar sem Karl Héðinn og aðrir stóðu að gegn fylkingu Gunnars Smára. Klofninginn má rekja opinberlega aftur til mars þegar Karl sakaði Gunnar Smára um ofríki og andlegt ofbeldi.

Sambandið löglegt og með samþykki beggja

Stelp­an um­rædda, Cosma Tieber, skrif­ar at­huga­semd við færslu Karls Héðins þar sem hún seg­ir ástar­sam­bandið hafa verið lög­legt, með samþykki beggja aðila og eitt­hvað sem hvorki hún né Karl sjá eft­ir.

Þá þykir henni mjög miður að samband þeirra sé dregið inn í op­in­bera umræðu á hátt sem snúi því upp í eitthvað skammarlegt. Hún segir óheiðarlegt að brengla persónulega sögu til að skaða orðspor fólks.

Hér fyrir neðan má sjá færslu Karls Héðins í heild sinni.