„Tæknivilla“ hafi valdið á­rás á fólk sem var að sækja sér vatn

Tíu létust, þar af sex börn og að minnsta kosti sextán særðust, þar af sjö börn.

Að sögn talsmanna hersins beindist árásin gegn ónafngreindum hryðjuverkamanni en vegna „tæknivillu“ féll sprengjan tugi metra frá skotmarkinu. Þeir segja atvikið í skoðun.

Að sögn BBC náðist eftirleikurinn á myndskeið, sem sýnir fólk hlaupa á vettvang til að aðstoða fórnarlömbin sem liggja innan um vatnsílát.

Alþjóðaráð Rauða krossins greindi frá því í gær að fleiri hefðu verið fluttir á sjúkrahús samtakanna í Rafah á síðustu sex vikum en á tólf mánuðum þar á undan. Þar af hefðu 132 fengið meðferð á laugardag, flestir vegna byssuskota.

31 hefði látist.

Fjöldi fólks hefur látist í árásum nærri stöðum þar sem mat og neyðargögnum er dreift.