Rann­saka Ís­lendingafélagið Burton Al­bion

Landsliðsframherjinn fyrrverandi samdi nýverið við Selfoss, uppeldisfélag sitt, eftir meira en áratug í atvinnumennsku. Jón Daði lék síðast með Burton Albion en þar skoraði hann fimm mörk ásamt því að gefa eina stoðsendingu í aðeins 13 leikjum.

Innkoma hans í liðið hjálpaði liðinu að klífa upp úr fallsæti og halda sæti sínu í League One eða C-deildinni á Englandi. Breska ríkisútvarpið greinir nú frá því að félagið sé í vandræðum vegna virkni þess á leikmannamarkaðnum síðasta sumar.

Fyrr sama sumar tók NFG, Nordic Football Group, yfir félagið. Í eigendahópi félagsins eru alls sex Íslendingar. Þar á meðal eru hjónin Ólafur Páll Snorrason og Hrafnhildur Eymundsdóttir, sem bæði voru í knattspyrnu á sínum tíma.

Þá var Bendik Hareide, sonur Åge Hareide – fyrrverandi þjálfara íslenska karlalandsliðsins, um tíma yfirmaður íþróttamála hjá félaginu en hann sagði starfi sínu lausu í janúar á þessu ári.

NFG heimtaði að tekið yrði til í leikmannahópi Burton og því voru 23 leikmenn fengnir inn síðasta sumar. Er það met á Bretlandseyjum er kemur að fjölda nýrra leikmanna í einum félagaskiptaglugga. Enska knattspyrnusambandið hefur áhyggjur af hversu margir utanaðkomandi aðilar komu að félagskiptunum.

Sem stendur nær rannsókn sambandsins aðeins til gluggans síðasta sumar og hefur því engin áhrif á hvort leikmenn gangi til liðs við það í dag.

Jón Daði skrifaði undir hjá Burton þann 16. janúar síðastliðinn þegar liðið sat sem fastast í fallsæti. Það birti til eftir að Selfyssingurinn mætti á svæðið. Samningur hans rann út í sumar og ákvað hann í kjölfarið að halda heim á leið þrátt fyrir að Burton hafi viljað bjóða honum nýjan samning.

BBC greindi frá.