Virkjanir í Skaga­firði úr vernd í bið en Urriða­foss í nýtingu

Ráðherrann leggur til þessar tvær breytingar frá niðurstöðu stjórnarmeirihlutans í umhverfis- og samgöngunefnd á síðasta þingi. Þingmálið snerist um flokkun fimm virkjanakosta í vatnsafli, sem komu til endurmats, en dagaði uppi í málþófi vorþingsins. Málið hafði áður hlotið gagnrýni úr mismunandi áttum en á ólíkum forsendum.

Þannig varaði forstjóri Landsvirkjunar við því að Alþingi útilokaði Skatastaðavirkjun með því að setja Héraðsvötn í verndarflokk. Talsmaður Landverndar taldi á hinn bóginn skuggalegt að opnað yrði á Kjalölduveitu með því að setja hana í biðflokk í stað verndar. 

Þá sagði varaformaður Sjálfstæðisflokksins ríkisstjórnina ætla að stefna landinu í viðvarandi orkuskort. Benti hann á að með tillögu stjórnarmeirihlutans væri einungis ætlunin að hleypa 22 prósentum vatnsaflsins, sem komu til flokkunar, í nýtingarflokk.

Tillaga ráðherrans núna ber með sér að komið er til móts við sjónarmið Landsvirkjunar um að virkjanakostir í Skagafirði verði ekki útilokaðir heldur skoðaðir betur í biðflokki. Jafnframt deilir ráðherrann áhyggjum um orkuskort:

„Alvarlegt ójafnvægi hefur skapast milli framboðs og eftirspurnar á raforkumarkaði með tilheyrandi verðhækkunum. Að mati Landsnets eru meiri líkur en minni á raforkuskorti á næstu árum þar sem grípa þurfi til skömmtunar til heimila og fyrirtækja. Miklar tafir hafa orðið á stórum og hagkvæmum verkefnum og óvissa ríkir um marga virkjunarkosti vegna jarðhræringa,“ segir í greinargerð ráðherrans með tillögunni.

Jóhann Páll vísar í stefnuyfirlýsingu ríkisstjórnar Samfylkingarinnar, Viðreisnar og Flokks fólksins. Þar sé lögð áhersla á aukna orkuöflun í þágu orkuöryggis, orkuskipta og verðmætasköpunar um allt land. 

Þar komi jafnframt fram að stutt verði við líffræðilega fjölbreytni og ráðist í aðgerðir til verndar ósnortnum víðernum. Rammaáætlun gegni lykilhlutverki í að tryggja jafnvægi milli orkunýtingar og náttúruverndar.