Ragga Nagli minnir á „grænu flöggin“ í sam­böndum

Ragnhildur er landsmönnum að góðu kunn sem áhrifavaldur, pistlahöfundur og fyrirlesari. Hún hefur búið í Danmörku síðastliðin sextán ár ásamt eiginmanni sínum, Snorra Steini Þórðarsyni arkitekt. Í skrifum sínum leggur hún jafnan áherslu á heilbrigðan lífsstíl, jákvæða hugsun og nytsamleg heilræði fyrir daglegt líf.

Í nýjasta pistlinum hvetur hún fólk til að beina sjónum ekki aðeins að varúðarmerkjum sambanda, heldur einnig að því sem hún kallar „grænu flöggin“ – einkenni heilbrigðs, trausts og uppbyggilegs sambands.

Meðal þeirra atriða sem Ragga nefnir eru:

• Biðjast afsökunar þegar þau hafa gert rangt.
• Samgleðjast þegar vel gengur og sýna samkennd í verki. 
• Sýna loforð í verki. 
• Hvetja þig til að halda þínum félagslegu tengslum utan sambandsins. 
• Hlusta á þig með athygli. 
• Virða þín mörk og setja þér skýr mörk. 
• Sýna vilja til að leysa ágreining. 
• Beita ekki þagnarbindindi, reiðiköstum eða fýlustjórnun til að ná sínu fram. 
• Þú upplifir öryggi með þeim. Hafa sömu markmið um sambandið. 
• Tala fallega við þig og um þig að þér fjarverandi. 
• Styðja þig þegar illa gengur. 

Ragga bendir á að í heilbrigðu sambandi upplifir fólk ást, samþykki og öryggi – að það sé nóg eins og það er, án þess að þurfa að breyta sér.

„Veljum fólkið í kringum okkur af kostgæfni,“ skrifar hún.