Kveikt í þinghúsinu og for­sætis­ráð­herrann hrökklast frá

Mótmælin í Nepal beinast að samfélagsmiðlabanni stjórnvalda sem þau hafa nú bakkað með. Þjóðin er aftur á móti slegin eftir að lögreglumenn skutu að minnsta kosti nítján mótmælendur til bana í gær og þrír aðrir voru drepnir í dag.

Reiður múgur ruddist inn í þinghúsið í dag, braut rúður og kveikti eld. Einnig hafa mótmælendur ráðist á aðrar stjórnarbyggingar í Katmandú. Alþjóðaflugvelli borgarinnar er lokaður vegna óróans. Forseti landsins og fulltrúar hersins hafa hvatt mótmælendur til þess að sýna stillingu.

Fyrr í dag sagði Khadga Prasad Oli af sér sem forsætisráðherra. Hann á engu að síður að stýra áfram starfsstjórn. AP-fréttastofan segir þó óljóst hvar Oli er niður kominn.

Undir reiðinni vegna samfélagsmiðlabannsins kraumaði gremja mótmælenda vegna landlægrar spillingar og bágs atvinnuástands ungs fólks. Atvinnuleyyi á meðal yngra fólks var tuttugu prósent í fyrra samkvæmt gögnum Alþjóðabankans. Stjórnvöld í Nepal áætla að um tvö þúsund ungmenni yfirgefi land á hverjum degi í leit að atvinnutækifærum annars staðar.