Stefnir í að for­ystan verði ó­breytt

Á sérstakri síðu á vef Viðreisnar má sjá að Þorgerður Katrín Gunnarsdóttir hafi ein boðið sig fram til formanns, Daði Már Kristófersson hefur einn boðið sig fram til varaformanns og Sigmar Guðmundsson hefur einn boðið sig fram til ritara flokksins. Framboðsfrestur rennur þó ekki út fyrr en klukkutíma fyrir kosningu til einstakra embætta.

Í tilkynningu frá flokknum segir að á landsþinginu verði stefnumál flokksins rædd, stjórnmálaályktun samþykkt og forysta flokksins kjörin. Landsþingið í ár ber yfirskriftina: Viðreisn lætur verkin tala.

Kosning til formanns fer fram klukkan 12:15 á sunnudag og klukkan 15 fer fram kosning til varaformanns og málefnaráðs. Klukkan 16 fer svo fram kosning ritara, meðstjórnenda og varamanna og alþjóðafulltrúa.

Þau sem hafa boðið sig fram til meðstjórnanda í stjórn flokksins eru: Elín Anna Gísladóttir, Oddgeir Páll Georgsson, Stefan Eagle Gilkersson, Urður Arna Ómarsdóttir, Þórdís Lóa Þórhallsdóttir, Þórey S. Þórisdóttir og Þröstur V. Söring. Til embættis alþjóðafulltrúa flokksins hafa Auðunn Arnórsson, Natan Kolbeinsson og Stefan Eagle Gilkersson boðið sig fram.

Æðsta vald

Haft er eftir Þorgerði Katrínu, sem hefur gegnt formennsku í flokknum frá árinu 2017, að það sé ótrúlega spennandi að ganga til landsþings á þessari stundu. „Við í Viðreisn finnum fyrir miklum meðbyr frá fólki um allt land og í öllum geirum. Erindi Viðreisnar um almannahagsmuni framar sérhagsmunum, um frelsi einstaklingsins, um ábyrgð í opinberum rekstri og um öryggi og lífsgæði almennings, hefur aldrei verið mikilvægara en núna - ekki síst þegar sveitarstjórnarkosningar eru framundan í vor,“ er haft eftir Þorgerði Katrínu, formanni sem jafnframt er utanríkisráðherra.

Landsþing Viðreisnar hefur æðsta vald í öllum málefnum flokksins og er haldið annað hvert ár. „Þetta er vettvangur þar sem félagar í flokknum fá tækifæri til þess að hafa áhrif á stefnumál Viðreisnar með formlegum hætti. Málefnavinna á þinginu mun fara fram í sérstökum málefnahópum á sviði atvinnumála, efnahagsmála, heilbrigðis- og velferðarmála, innanríkismála, jafnréttismála, mennta- menningar-, félags- og tómstundamála, umhverfis- og auðlindamála og utanríkismála. Þátttakendur munu velja sér hópa til að starfa í og að endingu verða ályktanir frá hverjum þeirra bornar fyrir þingið til samþykktar,“ segir í tilkynningunni.

Verhofstadt sérstakur gestur

Fram kemur að á huginn hefur verið mikill og stefni í stærsta landsþing Viðreisnar frá stofnun.

„Þorgerður Katrín Gunnarsdóttir, formaður Viðreisnar, mun halda ræðu á þinginu en einnig verða þar ræður frá Daða Má Kristóferssyni, varaformanni Viðreisnar, Sverri Páli Einarssyni, forseta Uppreisnar, og Guy Verhofstadt, fyrrverandi forsætisráðherra Belgíu og núverandi forseta Alþjóðlegu evrópuhreyfingarinnar. Á dagskrá þingsins eru einnig hringborð um atvinnumál, um Evrópusambandið og um sveitarstjórnarmál. Þá munu ráðherrar Viðreisnar sitja fyrir svörum á laugardeginum. Að lokum verður kosið til formanns, varaformanns, ritara, meðstjórnenda og fulltrúa í málefnaráð flokksins. Fyrir þinginu liggur tillaga um að setja á fót nýtt embætti alþjóðafulltrúa sem einnig verður kosið til ef tillagan fæst samþykkt,“ segir í tilkynningunni.