Lög­reglu­stjórinn: Segir pabbabrandara, elskar krimmasögur og segir húmor van­metinn

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég tek daginn alltaf snemma og segi oft „Morgunstund gefur gull í mund“. Vöknuð svona milli sex og hálf sjö. Þarf ekki vekjaraklukku en hef hana samt stillta svona 6:45 – ef ske kynni að ég myndi ekki vakna – hluti af öryggisfíklinum í mér.“

Hvað er það fyrsta sem þú gerir á morgnana?

„Fyrsta sem ég geri er að kveikja á gömlu gufunni eða Rás 1 – hún er mín uppáhaldsstöð. Fer aðeins eftir hve snemma ég mæti fram í eldhús hvað ég næ af dagskránni sem er endurspiluð mjög snemma í bítið. Síðan kemur morgunbæn og orð dagsins sem er oftast mjög góð hugleiðing inn í verkefni dagsins.

Mjög fljótlega kíki ég líka á símann skoða póstinn dagbók lögreglunnar og kíki á helstu miðla. Annað sem þarf að gerast mjög fljótlega er að setja kaffikönnuna af stað og það er annað hvort ég eða maðurinn minn sem gerum það og að taka úr uppþvottavélinni.

Kaffibolli með eiginmanninum á morgnana skiptir miklu og þá skiptum við Morgunblaðinu á milli okkar og það er lesið með bollanum. 

Rennt yfir helstu fréttir en síðan eru það minningagreinarnar og dánartilkynningar; já ég er ein af þeim sem les þær. 

Stundum hitti ég á börnin en á alltaf gott samtal við heimilishundinn Brúnó Rex.“

Ef þú fengir 10 sekúndna fyrirvara til að segja brandara, myndir þú ná því?

„Já myndi geta gert það en ekki viss um að hann væri rosalega góður eða djúpur – svona pabbabrandari, svo sem: 

Hvað er langt í matinn?? 

Tveir metrar. 

Já og froskabrandara sem hafa verið mínir uppáhalds í langan tíma.

Í mínum huga er húmor mjög vanmetin og er algjörlega ómissandi. Ég hef mjög gaman að því að sjá kómískar hliðar á lífinu hjá mér og öðrum. Hláturinn er allra meina bót og tala nú ekki um hve góð áhrif hann hefur á streituna.“

Í hvaða verkefni ertu að vinna helst í þessa dagana?

„Embættið setti sér metnaðarfulla stefnu í ársbyrjun 2024 og þessa daganna er ég á fullu við að undirbúa vinnudag með framkvæmdastjórninni minni þar sem farið verður yfir þau verkefni sem búið er að framkvæma tengd stefnunni og forgangsraða næstu verkefnum. 

Barnamálin, það er mál lögreglu þar sem börn eru annað hvort gerandi eða þolandi, eru mér alltaf ofarlega í huga en við erum einnig mikið að vinna gegn skipulagðri brotastarfsemi og þá eru öryggismál mikilvæg í víðtækri merkingu þess orðs. Það er svo auðvitað alltaf forgangsatriði hjá mér að hlúa vel að starfsfólkinu mínu sem sinnir krefjandi og oft gefandi verkefnum.

Samhliða breyttum heimi tekst embættið á við ýmsar áskoranir, en þeim fylgja líka tækifæri til að takast á við málin með sem bestum hætti. Miklar breytingar hafa orðið á starfsumhverfi lögreglu undanfarin ár og viðbúið að svo verði áfram. Hér hefur orðið þróun sem er sambærileg því sem gerist erlendis og taka verður mið af því.

Í frítíma prjóna ég svo mikið og akkúrat núna er ég með ungbarnagalla í vinnslu. Mér finnst gott að prjóna meðan ég horfi á sjónvarpið en ég ein af þeim sem vill gjarnan gera tvo hluti í einu.“

Hvernig skipuleggur þú þig í vinnu?

„Að eðlisfari er ég mjög skipulögð og hef bæði dagbók og svo Outlook. Skipulegg mig með mínum nánustu samstarfsmönnum og þá er ég að tala um stóru myndina skipt upp í haustönn /vorönn / sumar.

Svona dags daglega þá byrja ég á sunnudagskvöldum að fara yfir vikuna, í lok dags skoða ég hvað náðist og hvað ekki, kanna hvað morgundagurinn ber í skauti sér og svo snemma morguns skoða ég daginn. 

Þrátt fyrir að dagbókin sé mjög þétt setin að þá getur dagurinn breyst mjög hratt. Vinn í umhverfi þar sem alltaf er eitthvað að gerast sem er ekki planað og þá þarf að mæta því.

Enginn dagur er eins og þess vegna er líka gaman að vera í vinnunni þar sem umhverfið er svona lifandi.“

Hvenær ferðu að sofa á kvöldin?

„Fer að sofa svona milli klukkan ellefu og tólf og finnst mjög gott að lesa aðeins eða láta lesa fyrir mig og þar kemur „Storytel“ sterkt inn. 

Bókin má bara ekki vera of spennandi svo hún haldi fyrir mér vöku og sjálfsögðu eru það krimmar sem eru mínar uppáhalds bækur fyrir nóttina.“