Opnar sig um djammið: „Hjálpaði mér ekki“

Hinn þrítugi Grealish fór á láni frá City til Everton í sumar, með möguleika á að Everton kaupi hann alfarið fyrir 50 milljónir punda næsta sumar. Kantmaðurinn hefur farið vel af stað í vetur eftir misgóð ár í Manchester.

Hann byrjaði aðeins sjö leiki fyrir City á síðustu leiktíð og lenti í útistöðum við þjálfarann Pep Guardiola, sem ýtti honum til hliðar.

„Fólk segir að ég fari mikið út á lífið og ég geri það. Ég vil geta lifað lífinu og notið mín. En augljóslega þarf að velja stað og stund til að gera það á meðan ferlinum stendur,“ segir Grealish í viðtali við Tim Sherwood, fyrrum stjóra hans hjá Aston Villa, á Sky Sports.

„Ef ég á að vera hreinskilinn hef ég ekki alltaf valið réttu tímasetningarnar. Stundum, hjá City, hjálpaði ég sjálfum mér ekki. Ég get alveg viðurkennt það, en á móti kemur held ég að það hafi ekki haft allt að segja um hvernig fór,“ segir Grealish enn fremur.

Búast má við Grealish í byrjunarliði Everton sem mætir West Ham United í ensku úrvalsdeildinni klukkan 19:00 í kvöld. Um er að ræða fyrsta leik Nuno Espirito Santo við stjórnvölin hjá West Ham.

Leikur Everton og West Ham er klukkan 19:00 á Sýn Sport. Bein útsending hefst klukkan 18:40.