Úrvinnslusjóður svarar Sorpu

Tilkynning Úrvinnslusjóðs er í tilefni af því að Sorpa greindi frá því í dag að þau myndu þurfa að hækka sorphirðugjald á heimili á höfuðborgarsvæðinu vegna synjunar Úrvinnslusjóðs á að greiða Sorpu afturvirkt kostnað við sérmeðhöndlun drykkjarferna sem Sorpa ákvað að hefja á árinu 2023.

Í tilkynningu Úrvinnslusjóðs er áréttað að Sorpa hafi tilkynnt þann 7. júní 2023 um breyttar vinnsluaðferðir á drykkjarfernum og að það myndi fela í sér 75 milljóna króna kostnaðarauka. Sjóðurinn segir það alfarið á ábyrgð Sorpu.

„Í tilkynningu Sorpu frá í dag er látið að því liggja að í upphafi hafi verið áformað að Úrvinnslusjóður greiddi þennan kostnaðarauka, en að því hafi svo verið hafnað. Hið rétta er að engin beiðni barst Úrvinnslusjóði á þessum tímapunkti um að breyta gjaldskrá vegna pappa- og pappírsumbúða. Sorpa fór fyrst fram á umræddar greiðslur í febrúar 2024, og þá afturvirkt vegna ársins 2023. Stjórn Úrvinnslusjóðs tók erindið til umfjöllunar og hafnaði því, þar sem ekki lá fyrir greining á umhverfislegum ávinningi vinnslunnar. Í kjölfarið samdi Úrvinnslusjóður við Hagfræðistofnun HÍ um að gera kostnaðar- og ábatagreiningu á sérvinnslu drykkjarferna, með hliðsjón af umhverfislegum ávinningi. Niðurstaða þeirrar greiningar lá fyrir í september 2025 og svo virðist sem Sorpa hafi nú ákveðið á grundvelli hennar að falla frá sérvinnslu fernanna,“ segir í tilkynningunni.

Sorpa tilkynnti í dag að þau myndu hætta að flokka drykkjarfernur frá pappírsúrgangi. Vísað var til þess að fyrirkomulagið skili litlum árangri, sé verra fyrir loftslagið og sé afar dýrt.