Reiknar ekki með Elísu eða Andreu á morgun

Ísland hefur leik á HM á morgun gegn Þýskalandi. Liðið er núna að leggja hönd á undirbúninginn, í Porsche höllinni í Stuttgart.

Landsliðsþjálfarinn Arnar Pétursson undirbýr liðið og leggur leik morgundagsins upp án Elísu og Andreu. 

„Það er svipuð staða, þær taka test með sjúkraþjálfurunum á eftir en við keyrum þessa æfingu og undirbúninginn fyrir leikinn á morgun eins og þær séu ekki með“ sagði Arnar fyrir æfingu en lokaákvörðun verður svo tekin í kvöld.

Arnar var því ekki alveg tilbúinn að slá því föstu að þær yrðu ekki með. 

Elísa er líklegri til að spila en finnur enn fyrir eymslum í öxlinni. Andrea reiknar hins vegar ekki með að mæta til leiks fyrr en á sunnudaginn, í lokaleik riðilsins gegn Úrúgvæ.

„Ég er að prófa aðeins í dag að vera með í handbolta þannig að leikurinn á morgun er mjög tæpur en við stefnum á þriðja leikinn. Allt fyrir það er bónus“ sagði Andrea fyrir æfingu.

Nánar verður fjallað um fyrsta leik Íslands á HM í Sportpakkanum í kvöld.

Opnunarleikur Þýskalands og Íslands hefst klukkan fimm á morgun og verður í beinni textalýsingu á Vísi.

Íþróttadeild Sýnar er í Stuttgart og mun fylgja landsliðinu vel eftir á meðan mótinu stendur.