„Ég ætla ekki að bera á­byrgð á því“

Þegar Ísland komst í undanúrslit á EM í janúar var það í fyrsta sinn í 16 ár sem liðið kemst svo langt. Við blasti hins vegar strembin staða. HSÍ fékk aðeins úthlutað 100 miðum á undanúrslitaleikinn við Dani.

Meira og minna allir miða hússins fóru í almenna sölu og lítið sem stóð eftir fyrir þau lið sem komust ásamt Dönum í undanúrslitin. HSÍ náði með herkjum að fjölga miðunum umtalsvert og eftir erfiða bið komst stuðningssveit Íslands, Sérsveitin, til að mynda á leikinn - sem ekki var útlit fyrir að myndi raungerast í fyrstu.

Fyrirkomulagið var víða gagnrýnt en því er velt upp hvað sé til ráða.

Snorri Steinn Guðjónsson, landsliðsþjálfari, gerði mótið upp í viðtali við Sýn á dögunum og spurður hreinlega hvort Íslendingar þyrftu að fara að huga að því strax núna að kaupa miða á úrslitahelgina á HM í Þýskalandi á næsta ári?

Snorri hló áður en hann svaraði: „Ef ég þekki ykkur rétt, þá er það umræðan. En ég ætla ekki að hvetja fólk til þess,“ segir Snorri og hlær.

„Ég ætla ekki að bera ábyrgð á því ef ég kem liðinu ekki alla leið,“ bætir hann við léttur.

„Auðvitað finnst mér það mjög spes, sama hvort þú spilar í Danmörku eða annarsstaðar, að þú spilir í 15 þúsund manna höll og hver þjóð geti átt von á 100 miðum. Það er helvíti lítið,“ segir Snorri.

„Ég held að Danirnir hefðu alveg fundið stuðning þó þeir hafi verið 13 þúsund og 500 Íslendingar.“

„En þetta hefur væntanlega alltaf verið svona, við skulum ekki gleyma því. Við erum að komast þarna í fyrsta skipti í 16 ár og þekkjum ekki alveg þessa stöðu. Við þurfum bara að læra af því. Ég held að HSÍ geri það alveg. Ef og þegar við komumst aftur þarna verða vonandi fleiri en hundrað,“ segir Snorri Steinn.

Viðtalið má sjá í spilaranum. Umræðan um miðamálin hefst þegar 24 mínútur og 13 sekúndur eru liðnar á viðtalið.