Starfs­menn Louvre mót­mæla slæmum að­stæðum

Um fjögur hundruð starfsmenn safnsins, sem eru í tveimur verkalýðsfélögum, samþykktu einróma á fundi að hefja verkfallið. Um 2.200 manns vinna hjá safninu og tilheyra þeir mörgum verkalýðsfélögum en forsvarsmenn þeirra tveggja sem hófu verkfall í morgun segja aðgerðirnar njóta mikils stuðnings og eiga von á fleirum í verkfall, samkvæmt frétt Le Monde.

Vonsviknum ferðamönnum var snúið við í massavís í morgun en milljónir manna koma frá öllum hornum heimsins á ári hverju til að heimsækja safnið.

Le Monde hefur eftir ferðamönnum í brúðkaupsferð frá Suður-Kóreu að helsta ástæðan fyrir því að þau fóru til Parísar hafi verið að heimsækja Louvre. Þau voru leið yfir því að komast ekki á safnið í morgun.

Nýlega var framið rán um hábjartan dag í safninu og komust þjófarnir meðal annars undan með hluta af krúnudjásnum Napóleons. Í opinberri rannsókn kom fram að öryggisbúnaður eins og myndavélar og annað væri kominn til áranna, stjórnstöðvar hefðu ekki verið nægilega mannaðar og að slæm samhæfing hafi leitt til þess að lögregluþjónar voru fyrst sendir á rangan stað.

Í frétt France24 segir að margt fleira hafi komið upp á í safninu að undanförnu og að líðan starfsmanna hafi versnað töluvert. Í sumar gerðu þeir til að mynda skyndiverkfall sem hafði mikil áhrif á starfsemi á safninu.

Táknmynd ástandsins í ferðaþjónustu

Um þrjátíu þúsund manns sækja safnið heim á hverjum degi og berja munina þar inni augum. Aðstæður á Louvre hafa orðið eins konar táknmynd fyrir of mikla fjölgun ferðamanna í París.

Þetta fólk þarf að bíða í gífurlega löngum röðum og hafa forsvarsmenn verkalýðsfélaga sagt að innviðir á safninu, eins og salerni og mataraðstaða, anni engan veginn öllum þessum fjölda. Þá hafi ástand hallarinnar sem hýsir safnið versnað til muna og þörf sé á meira viðhaldi.

Til marks um það þurfti að loka hluta safnsins fyrr á árinu, þar sem gólfbitar voru orðnir lélegir og þá skemmdust munir nýverið þegar vatnsleki varð á safninu.

Yfirarkitekt safnsins viðurkenndi fyrir framan þingmenn á dögunum að safnhúsið væri í slæmu ásigkomulagi.