Ólafur og Lúð­vík stýra U21-strákunum

Það verða þeir Lúðvík Gunnarsson og Ólafur Helgi Kristjánsson sem taka við liðinu og stýra því út yfirstandandi undankeppni EM sem lýkur í október.

Ólafur Helgi var ráðinn inn til KSÍ í haust sem aðstoðarþjálfari A-landsliðs kvenna auk þess sem hann leiðir þróun og stefnumótun yngri landsliða kvenna og sinnir verkefnum tengdum fræðslumálum hjá KSÍ. Lúðvík var aðstoðarþjálfari U21-liðsins.

Ólafur Helgi aðstoðaði Lúðvík þegar hann stýrði U21-liðinu í 3-1 sigri gegn Lúxemborg í nóvember, skömmu eftir að Ólafur Ingi hætti, en í tilkynningu KSÍ segir að þeir verði nú saman sem tveir aðalþjálfarar liðsins.

Lúðvík er einnig þjálfari U17 landsliðs karla og hefur KSÍ ákveðið að þar sem verkefni U21 liðsins skarast á við verkefni U17 landsliðs karla í mars þá muni Ómar Ingi Guðmundsson, sem er þjálfari U15 karla og aðstoðarþjálfari U19 karla auk þess að vera yfirmaður hæfileikamótunar, stýra U17 liðinu í fjarveru Lúðvíks í því verkefni.

Næstu leikir U21-landsliðsins eru við Eistland á heimavelli 26. mars og við Frakkland á útivelli 30. mars. Liðið lýkur svo undankeppninni með þremur leikjum næsta haust.

Frakkland er efst í riðli Íslands með 10 stig eftir 4 leiki. Næst koma Færeyjar með 9 stig eftir 6 leiki en bæði Sviss og Ísland hafa 8 stig eftir 5 leiki. Lúxemborg er svo með 4 stig og Eistland neðst með 2 stig.