Liverpool þénaði meira en Manchester United í fyrsta sinn

Fjármálafyrirtækið Deloitte heldur úti svokallaðri „peningadeild“ í fótboltanum, sem er árlegur listi yfir tekjuhæstu félög síðasta tímabils (2024-25 að þessu sinni).

Manchester United er það félag sem hefur oftast verið í efsta sæti en það gerðist síðast árið 2017 og United er fallið niður í áttunda sæti listans, sem kom út í gær.

Tekjur Manchester United skertust verulega vegna þess að liðið komst ekki í Meistaradeildina á síðasta tímabili og búast má við svipuðum tölum á næsta ári því United er ekki í neinni Evrópukeppni þetta árið. Þá er liðið líka fallið úr báðum bikarkeppnunum og mun því aðeins spila tuttugu heimaleiki á öllu tímabilinu, sem drýgir leikdagstekjur verulega.

„Ef þú horfir tíu eða fimmtán ár aftur í tímann þá var Manchester United fyrirmynd allra annarra félaga. Þeir voru félagið sem allir aðrir miðuðu sig við en ég held að það sé ekki staðan lengur“ sagði Tim Bridge, forsvarsmaður Deloitte, við Sky Sports.

Hærri toppar en enski boltinn trónir heilt yfir

Real Madrid, Barcelona, Bayern Munchen og PSG skipa efstu fjögur sæti listans en þau fóru öll langt í Meistaradeildinni og á HM félagsliða á síðasta tímabili.

Liverpool er svo í fimmta sæti, með Manchester City, Arsenal, Manchester United, Tottenham og Chelsea í sætunum fyrir neðan.

Stærstu liðin á Spáni, í Þýskalandi og í Frakklandi eru því að þéna meira en stærstu liðin á Englandi, en samanlagt eru ensku liðin að þéna langmest því þau eiga níu fulltrúa á tuttugu liða listanum.

Ensku félögin munu síðan vera með hærri sjónvarpstekjur á næsta lista því nýr samningur um sýningarrétt tók gildi á þessu tímabili.

Ekki gefið að félögin græði

Þessi listi frá Deloitte tekur bara fyrir tekjuöflun liðanna en háar tekjur setja ekki samasemmerki við mikinn gróða. Þvert á móti þá voru fjögur af efstu tíu liðum listans rekin með tapi á síðasta tímabili.

Svo er líka hægt að blása tekjutölurnar vel upp, eins og Barcelona gerði á síðasta tímabili með því að selja VIP ársmiða sem gilda næstu þrjátíu árin.