Dæmi um leik­skóla þar sem enginn starfs­maður talar ís­lensku

Ingibjörg Ísaksen var gestur í vöfflukaffi Framsóknarflokksins í Árborg í gær þar sem hún fór yfir stöðuna í flokknum og landsmálunum. Hún er þingflokksmaður Framsóknarflokksins og er í framboði á móti Lilju Alfreðsdóttur um formannssætið í flokknum en kosning um sætið fer fram á flokksþingi um næstu helgi.

Ingibjörg hefur miklar áhyggjur af atvinnuleysi ungs fólks.

„Já því bara nýjustu tölur sýna okkur að atvinnuleysi er að komast upp í 5 prósent en atvinnuleysi 16 til 24 ára er í kringum 10 prósent og þetta vekur miklar áhyggjur hjá mér. Ég brenn fyrir málefnum barna og ungmenna og hef haft áhyggjur af þeirra stöðu. Þetta er allt, allt of mikið og þarna þurfum við að bregðast við,” segir Ingibjörg.

Ingibjörg fjallaði líka um stöðu leikskólanna í landinu og sagðist vita af leikskólum þar sem enginn starfsmaður talar íslensku.

„Já, mér skilst það á þeim aðilum, sem ég hef verið að tala við innan kerfisins, sem hafa þessa tölfræði. Við sjáum það að fagmenntuðum kennurum bæði í leik- og grunnskólum, þeim er að fækka, stéttin er að eldast og í þessum dreifðu byggðum hreinlega skortir starfsfólk, sem talar íslensku,” segir Ingibjörg.

Er það ekki alvarlegt?

„Það er alveg mikið áhyggjuefni því við vitum það að tungumálið, íslenskan er lykillinn í samfélaginu”.

En er Ingibjörg bjartsýn á að hún verði nýr formaður Framsóknarflokksins eða hvað?

„Já, ég er að minnsta kosti að leggja mig fram við það að ná því markmiði. Við skulum sjá til hvað setur, við erum tvær öflugar konur núna í baráttu um þetta sæti. Þetta verður áhugavert um næstu helgi,” segir Ingibjörg.