Drama í skíða­göngu Dags: Stytti sér leið en fékk samt silfur

Hinn franski Mathis Desloges varð annar í mark á eftir Johannes Høsflot Klæbo í 20 kílómetra skiptigöngunni, en í fyrsta hring eftir skiptin úr hefðbundinni göngu yfir í frjálsa aðferð stytti hann sér augljóslega leið.

Sjá einnig: Dagur hringaður seint og þurfti að hætta

Desloges var þá fremstur á leið í beygju en stytti sér leið, hann fór ekki út fyrir merkingar eins og aðrir keppendur heldur á milli þeirra, eins og sjá má á meðfylgjandi myndbandi og skjáskoti hér fyrir neðan. 

Dómarar keppninnar ákváðu að gefa honum gult spjald fyrir þetta brot en sumir vilja meina að hann hefði átt að vera dæmdur úr leik.

„Þetta er bara alveg ótrúlegt ef þú spyrð mig, því hann var fremstur og valdi að fara þessa leið“ sagði Fredrik Aukland, sem lýsti keppninni hjá norska ríkisútvarpinu.

Norska skíðasambandið, sem átti hina tvo keppendurna á verðlaunapallinum, ákvað hins vegar að mótmæla dómnum ekki.

„Mér finnst hann ekki græða neitt á þessu. Við munum ekki mótmæla gula spjaldinu og fara fram á meira. Hann er fyrstur inn í beygjuna og fyrstur út úr henni, þetta hefði verið öðruvísi ef hann hefði tekið fram úr öðrum. Þetta er augljóst brot á reglum, en út frá aðstæðum í keppninni metum við það þannig að hann hafi ekki grætt neitt á þessu.“

Norðmenn eru greinilega ekki í hefndarhug eftir að hafa verið dæmdir úr leik fyrir eiginlega alveg eins brot á HM í fyrra.