Norski snillingurinn hjálpaði Svíum að vinna gull­verð­laun

Klæbo þykir vera með einstaklega góðan skíðagöngustíl, hann er á hraðleið með að taka fram úr Björn Dæhle sem sigursælasti skíðagöngukappi sögunnar á Vetrarólympíuleikunum og hefur nú þegar sópað til sín tveimur gullverðlaunum í Mílanó og Cortina. 

Hann ákvað að leggja nágrönnum sínum frá Svíþjóð lið fyrir keppni dagsins í kvennaflokki, þar sem Kristrún Guðnadóttir var meðal keppenda og Frida Karlsson stóð uppi sem sigurvegari.

Fyrir keppnina greindi Karlsson frá því við SVT að Klæbo hefði gefið henni ráð um hvernig ætti að takast á við 10 kílómetrana og eftir keppnina var hún til í að gefa honum kredit.

„Já, hann má fá það… Ég fékk skýrar leiðbeiningar sem ég reyndi að hafa í huga“ sagði Karlsson við NRK eftir keppni.

„Hann hefði ekki átt að hjálpa Svíum, þeir eru nú þegar svo góðir“ sagði þá fyrrum skíðagöngukonan og fjórfaldi gullverðlaunahafinn Therese Johaug létt í bragði.