KA/Þór klemmdi Sel­foss við botninn

KA/Þór vann að lokum 26-22 sigur í leiknum á Selfossi í dag, eftir að staðan hafði verið jöfn í hálfleik, 13-13.

Sigurinn þýðir að KA/Þór er nú með 15 stig í 6. sætinu og getur alfarið einbeitt sér að því í síðustu fjórum umferðunum að þokast ofar áður en sex liða úrslitakeppnin hefst. Liðið er aðeins tveimur stigum á eftir Fram, þremur á eftir ÍR og fjórum á eftir Haukum.

Selfoss er hins vegar neðst með fjögur stig, stigi á eftir Stjörnunni. Nú er endanlega ljóst að annað þessara liða fellur en hitt liðið fer í umspil við lið úr Grill 66-deildinni.

Akureyringar byrjuðu seinni hálfleik af miklum krafti í dag og komust í 19-14. Heimakonum tókst aldrei að brúa þetta bil en minnkuðu muninn mest í þrjú mörk þegar skammt var eftir.

Bernadett Leiner virðist hafa átt afar góðan leik í marki KA/Þórs, með 48,6% markvörslu samkvæmt HB Statz. Tinna Valgerður Gísladóttir var markahæst í liðinu með 6 mörk og þær Trude Hakonsen og Bergrós Ásta Guðmundsdóttir skoruðu 5 mörk hvor.

Hjá Selfossi var Hulda Dís Þrastardóttir langmarkahæst með 8 mörk.