Þolin­mæðin á þrotum: „Gerist aldrei neitt“

„Húsið er al­gjör­lega sprungið,“ segir Friðjón B. Gunnars­son, for­maður ís­hokkí­deildar SR. „Við erum með gríðar­lega marga iðk­endur, bæði í ís­hokkí sem og list­skautum. Við erum með búnings­klefa sem eru á háannatíma fullir af iðk­endum og for­eldrum að klæða sig í og úr. Hér hefur staðið til lengi að byggja við húsið þannig að við fengjum annað svell til æfinga. Það er mis­jafnt hvað maður heyrir þessu tengt, hvort viðbyggingin eigi að vera í fullri stærð eða aðeins minna. Það er búið að teikna þetta upp, þetta er á for­gangs­lista hjá Reykja­víkur­borg en við erum búnir að heyra þetta núna í meira en ára­tug að það eigi að byggja en það gerist aldrei neitt.“

For­svars­menn SR hafi hingað til sýnt mikla þolin­mæði í þessu máli en finnst nú komið að þeim tíma­punkti að Reykja­víkur­borg byggi viðbótar­svell við skauta­höllina í Laugar­dalnum þannig að íþróttin geti vaxið og fái að þrífast al­menni­lega.

Ekki ákjósanleg staða

Að sögn Friðjóns hefur iðk­endum í skautaíþróttum fjölgað stöðugt undan­farin ár og er SR ekki eitt um að búa við aðstöðu sem er sprungin. Það er líka raunin í Egils­höllinni og á Akur­eyri en einungis þessar þrjár skauta­hallir er að finna á landinu.

Hvernig eru aðstæður hér í Laugar­dalnum þegar að mest lætur?

„Þá er þetta svell krökt af krökkum. Í dag erum við til að mynda með skauta­skólann hérna og æfingar hjá undir átta og tíu ára liðum okkar. Allir saman inn á ís, sem er ekki ákjósan­leg staða. Við erum með þjálfara fyrir hvern einasta flokk og erum að reyna stjórna þessum fjölda því það er gríðar­leg aðsókn í íþróttina.

SR fer með sín mál á borð Íþrótta­banda­lags Reykja­víkur sem er síðan í sam­skiptum við borgar­yfir­völd.

„Það eru gríðar­lega mörg mann­virki sem þarf bæði að laga og byggja. við erum þar nafn á blaði. Það sem ég er að reyna vekja at­hygli á er að okkur finnst vera komið að okkur. Svellið hér er byggt árið 1990, það er byggt yfir það 1998. Síðan þá hefur ekkert gerst fyrir skautaíþróttir í Reykja­vík ef við drögum frá Egils­höllina sem var einka­fram­kvæmd.“

Skorar á borgarfulltrúa

Að bestu vitund Friðjóns hafi Skauta­höllin í Laugar­dalnum alltaf verið rekin með hagnaði.

„Þá er líka mjög hag­kvæmt upp á framtíðina að gera að vera með skauta­svell við fjöl­nota íþrótta­hús því þá geturðu nýtt varmann frá vélinni sem frystir ísinn til þess að hita húsnæðið. Þetta er mjög hag­kvæmt.“

Ertu vongóður um að eitt­hvað breytist í náinni framtíð?

„Nei ég get ekki sagt það. En ég verð að vera bjartsýnn og skora á borgar­full­trúa í Reykja­vík að koma hingað í heimsókn, hitta okkur. Ég skal baka köku og get sýnt þeim aðstöðuna okkar. Við erum mjög þakk­lát fyrir þessa aðstöðu en þurfum meira. Það er komið að okkur.“