Sinueldur við Elliða­vatn

Um var að ræða  fimmta útkall slökkviliðsins vegna sinuelds á einum sólarhring. Veðurfarið það sem af er ári hefur einkennst af miklum þurrki og úrkomuleysi.

Fylgst var með gangi mála í vaktinni neðst í fréttinni.

Fyrst um sinn var einn dælubíll sendur á vettvang og talið að hægt væri að ráða niðurlögum eldsins. Hins vegar tók eldurinn að dreifa sér og sást reykurinn út um allt höfuðborgarsvæðið. 

Allt tiltækt lið var boðað út á vettvang.

Samkvæmt sjónarvotti var eldlengjan um tíma orðinn  um kílómetra löng og teygði hún sig í átt að hinu sögufræga útivistarsvæði Guðmundarlundi. 

Mikið umferðaöngþveiti var á svæðinu vegna forvitinna vegfaranda og áttu viðbragðsaðilar erfitt með að komast að. Fólk þótti einnig standa ansi nálægt eldinum.

Myndir frá lesendum Vísis sýna að reykurinn sást alla leið vestur í bæ að Háskóla Íslands og þá fannst lykt af eldinum alla leið að álverinu í Hafnarfirði. 

Á svipuðum tíma í gær kom upp eldur á Kjalarnesi og í nótt kviknaði sinueldur bæði í Norðlingaholti og við Vífilsstaðavatn í Garðabæ. Fyrr í dag kviknaði eldur á Reykjavíkurflugvelli. 

Hér að neðan mátti fylgjast með vaktinni. Ef hún birtist ekki er ráð að endurhlaða (e. refresh) síðuna.