Stiven fagnaði Íslendingaslag en átta mörk Óðins dugðu ekki

Benfica vann þá fjögurra marka sigur á Kristianstad, 38-34, eftir að hafa verið einu marki yfir í hálfleik, 19-18.

Stiven skoraði þrjú mörk fyrir Benfica í leiknum en Einar Bragi Aðalsteinsson var með tvö mörk fyrir sænska félagið. Stiven skoraði eitt marka síns liðs þegar þeir keyrðu yfir Kristianstad á lokamínútum leiksins.

Staðan var 31-31 þegar tæpar níu mínútur voru eftir en portúgalska liðið vann lokamínúturnar 7-3. Benfica er með fjögur stig í riðlinum, tveimur meira en Kristianstad sem situr á botni hans.

Óðinn Þór Ríkharðsson var langmarkahæstur í sínu liði en það dugði Kadetten Schaffhausen ekki á móti þýska félaginu Hannover-Burgdorf.

Hannover-Burgdorf mætti til Sviss og vann tólf marka sigur, 36-24, eftir að hafa verið 15-14 yfir í hálfleik.

Óðinn skoraði átta mörk eða þriðjung marka síns liðs. Næstmarkahæsti maður Kadetten skoraði fjögur mörk. Aðeins eitt marka Óðins komu úr víti og hann nýtti öll skotin sín nema eitt.

Kadetten var búið að vinna tvo af fyrstu þremur leikjum sínum í riðlinum alveg eins og Hannover-Burgdorf.