Ríkarður ráðinn að­stoðar­for­stjóri

Í tilkynningu þess efnis á vef Landsnets segir að Ríkharður gjörþekki orkugeirann og íslenskt atvinnulíf. Hann hafi starfað hjá Landsvirkjun frá árinu 2011 að fjölbreyttum verkefnum, einkum á sviði viðskipta- og markaðsmála. Hann hafi verið framkvæmdastjóri í um níu ár, þar af síðustu fimm ár sem framkvæmdastjóri viðskiptaþróunar og nýsköpunar auk þess að stýra alþjóðlegum verkefnum fyrirtækisins í gegnum dótturfélagið Landsvirkjun Power. Þá hafi hann átt sæti í stjórnum fyrirtækja á borð við Farice, Laki Power, Jarðböðunum á Mývatni og sitji í stjórn Samorku og Grænvangs.

Þar áður hafi Ríkarður verið stjórnendaráðgjafi hjá McKinsey, forstöðumaður og ráðgjafi hjá íslenskum fjármálafyrirtækjum og stjórnandi hjá bandarísku hátæknifyrirtæki í London. Hann hafi útskrifast með BSc. gráðu í rafmagns- og tölvuverkfræði frá University of Denver árið 2000, MSc. gráðu í rafmagnsverkfræði frá Stanford University árið 2002 og lokið námi í stjórnunarfræðum við IMD Business School árið 2017.

„Það er frábært að fá Ríkarð til liðs við Landsnet og mun þekking hans og reynsla nýtast afar vel við að mæta þeim fjölmörgu áskorunum sem við blasa. Styrking og áframhaldandi uppbygging flutningskerfisins er lykilatriði fyrir íslenskt samfélag og atvinnulíf til frambúðar og við verðum öll að leggjast á eitt svo það megi takast. Ráðning Ríkarðs mun styrkja okkur á þeirri vegferð og bjóðum við hann hjartanlega velkominn til Landsnets,“ er haft eftir Rögnu Árnadóttur, forstjóra Landsnets.