Sel­foss hafði sætaskipti við Stjörnuna á botninum

Mikið var undir í leiknum á Selfossi í dag en fyrir hann munaði aðeins einu stigi á liðunum. Eftir leikinn munar áfram einu stigi á þeim en Selfyssingar eru núna í 7. sætinu en Stjörnumenn í því áttunda og neðsta.

Stjarnan byrjaði leikinn betur og komst í 5-9. Selfoss svaraði með 10-1 kafla og náði fimm marka forskoti, 15-10. Heimakonur voru fjórum mörkum yfir í hálfleik, 17-13.

Marte Syverud skoraði níu mörk fyrir Selfoss í leiknum í dag og Hulda Dís Þrastardóttir sjö. Í seinni hálfleik hleyptu Selfyssingar Stjörnukonum aldrei nær sér en tveimur mörkum og enduðu á að vinna, 35-33.

Þetta var þriðji sigur Selfoss í deildinni á tímabilinu en liðið er með sex stig, einu stigi meira en Stjarnan. Í síðustu tveimur umferðunum mætir Selfoss Haukum á heimavelli og ÍR á útivelli. Stjarnan fær aftur á móti Fram í heimsókn og sækir svo Hauka heim.

Sara Katrín Gunnarsdóttir skoraði átta mörk fyrir Stjörnuna sem hefur tapað sjö leikjum í röð. Eva Björk Davíðsdóttir gerði sjö mörk.

Liðið í áttunda og neðsta sæti Olís-deildarinnar fellur niður í Grill 66-deildina en liðið í 7. sæti fer í umspil.