Diljá þurfti að­eins þrjár mínútur til að leggja upp mark

Brann heimsótti Molde í fyrstu umferð norsku deildarinnar og vann 5-0 sigur. Titilvörnin byrjar því afar vel en Brann varð norskur meistari í fyrra með Diljá innanborðs.

Diljá Ýr byrjaði á bekknum í kvöld en kom inn á völlinn í seinni hálfleik þegar staðan var orðin 2-0.

Brenna Lovera, fyrrum leikmaður ÍBV og Selfoss í íslensku deildinni, skoraði tvisvar í fyrri hálfleiknum, fyrst á 3. mínútu og svo aftur á 31. mínútu.

Diljá og Cecilie Kvamme komu báðar inn á sem varamenn á 56. mínútu og aðeins þremur mínútum síðar var Diljá búin að leggja upp mark fyrir Kvamme.

Varamaðurinn Anna Aahjem bætti við fjórða markinu á 76. mínútu og aðeins fjórum mínútum síðar kom fimmta markið en það var skráð sjálfsmark.