Svein­dís Jane valin besti leik­maður vikunnar

Sveindís Jane var valin besti leikmaður vikunnar í NWSL-deildinni.

Hún skoraði tvö mörk og gaf eina stoðsendingu að auki þegar Angel City vann 3-1 sigur á Bay FC.

Þetta voru fyrstu mörkin sem Sveindís kom að á leiktíðinni en Angel City er á toppnum með fullt hús eftir tvær umferðir.

Fyrra markið hennar kom strax á þriðju mínútu þegar hún fékk frábæra stungusendingu frá Kennedy Fuller sem hún afgreiddi glæsilega.

Sveindís lagði síðan upp annað markið óeigingjarnt fyrir Gisele Thompson á 32. mínútu og skoraði síðan þriðja markið sjálf á 53. mínútu þegar hún skallaði boltann í markið eftir hornspyrnu.

Sveindís er þar með þegar búin að tvöfalda markafjölda sinn frá því á fyrsta tímabilinu með Angel City þegar hún var með eitt mark í þrettán leikjum.