Enginn grunn­skóli á Raufar­höfn í vetur

Katrín Sigurjónsdóttir sveitarstjóri Norðurþings segir börnin tvö hafa verið í Öxarfjarðarskóla í vor en þangað er um sextíu kílómetra leið frá Raufarhöfn. Hún segir að það hafi sömuleiðis gengið illa að fá fólk með starfsréttindi til starfa við skólann.

„Þetta er óhjákvæmilegt skref þegar samfélagið eldist og það eru ekki börn á skólaaldri,“ segir hún.

Norðurþing hafi barist fyrir því að sérstakur byggðarkvóti á Raufarhöfn yrði aukinn en ekki haft erindi sem erfiði. Sveitarstjórnin sé þó vakandi fyrir hverju því sem hægt væri að byggja upp í byggðalaginu.

„Ef atvinnulífið styrkist á Raufarhöfn hefur staðurinn upp á allt að bjóða. Ég hef fulla trú á Raufarhöfn til framtíðar,“ segir Katrín Sigurjónsdóttir sveitarstjóri Norðurþings.