De Zerbi tekinn við Tottenham

Frá þessu greinir Tottenham í fréttatilkynningu nú fyrir skömmu en De Zerbi var síðast þjálfari Marseille í Frakklandi en tekur nú við Tottenham eftir að bráðabirgðastjóranum Igor Tudor var sagt upp störfum.

Gengi Tottenham upp á síðkastið hefur verið afleitt. Liðið er aðeins einu stigi frá fallsæti í ensku úrvalsdeildinni og er dottið úr leik í öðrum keppnum.

Fyrsti leikur De Zerbi með Tottenham verður útileikur gegn Sunderland þann 12. apríl næstkomandi. 

„Ég er himinlifandi með að ganga til liðs við þetta frábæra félag,“ er haft eftir De Zerbi í tilkynningu Tottenham. Markmiðið til skemmri tíma sé að klifra ofar í stöðutöflunni í ensku úrvalsdeildinni. 

De Zerbi mætir til Tottenham með reynslu úr ensku úrvalsdeildinni. Hann var á sínum tíma þjálfari Brighton í deildinni og stýrði liðinu til síns besta árangurs í deildinni til þessa. Þá hefur hann stýrt liðum á borð við Marseille, Shakhtar Donetsk og Sassuolo á Ítalíu.