Gaf Brann-liðinu hans Freys fall­ein­kunn: „Átakan­lega slakt“

Brann laut í lægra haldi fyrir Sandefjord, 0-1, á heimavelli í gær. Liðið hefur tapað þremur af fyrstu fjórum leikjum sínum í norsku úrvalsdeildinni á tímabilinu.

„Þetta er átakanlega slakt. Svo einfalt er það,“ sagði Jonas Grønner, fyrrverandi leikmaður Brann og núverandi álitsgjafi hjá Bergensavisen, í hálfleik. Hljóðið í honum var ekkert betra í leikslok.

„Þetta var ótrúlega slök frammistaða. Það er næstum því þannig að ég trúi því ekki sjálfur,“ sagði Grønner sem lék með KR sumarið 2013 og varð Íslandsmeistari með liðinu.

Freyr tók við Brann í byrjun árs 2025. Á síðasta tímabili endaði liðið í 4. sæti norsku úrvalsdeildarinnar.

Fjórir Íslendingar leika með Brann: Jón Dagur Þorsteinsson, Kristall Máni Ingason, Sævar Atli Magnússon og Eggert Aron Guðmundsson.

Næsti leikur Brann er gegn meisturum Viking á útivelli á laugardaginn kemur.