Valskonur einum sigri frá úrslitaeinvíginu eftir stór­sigur

Yfirburðirnir voru miklir í leik tvö enda mættu Valskonur mun einbeittari til leiks en í leik eitt þar sem þær lentu í talsverðum vandræðum.

Valur vann leikinn í kvöld á endanum með níu marka mun, 27-18, eftir að hafa verið sex mörkum yfir í hálfleik, 14-8.

Framkonur hentu frá sér sigrinum í leik eitt og voru lentar 10-4 undir í upphafi leiks í kvöld.

Valskonur voru því mun sterkari frá byrjun og þurfa nú aðeins einn sigur í viðbót til að tryggja sér sæti í úrslitaeinvíginu á móti annaðhvort Haukum eða ÍBV.

Ásdís Þóra Ágústsdóttir var markahæst hjá Val með fimm mörk en þær Lovísa Thompson og Elísa Elíasdóttir skoruðu fjögur mörk hvor. Guðrún Hekla Traustadóttir var svo með þrjú mörk.

Hulda Dagsdóttir skoraði fimm mörk fyrir Fram en þær Ásdís Guðmundsdóttir og Dagmar Guðrún Pálsdóttir voru með þrjú mörk hvor.