Sjálf­stæðis­flokkur, Við­reisn og Sam­fylking mynda meiri­hluta í Hafnar­firði

Þetta kemur fram í til­kynningu frá odd­vitum flokkanna þriggja í Hafnarfirði. Meiri­hluta­viðræður í sveitarfélaginu hafa verið viðburðarríkar en fyrst stóð til að endur­nýja sam­starf Sjálf­stæðis­flokksins og Framsóknar­flokksins sem mynduðu meiri­hluta á síðustu tveimur kjörtíma­bilum.

Samfylkingin missti tvo bæjarfulltrúa í kosningunum fyrir viku og bættu Framsókn og Viðreisn í stað þess við sig einum manni hvor. 

Miðflokkurinn fékk einnig mann inn í bæjarstjórn en Sjálfstæðisflokkurinn missti bæjarfulltrúa og fór úr fjórum í þrjá. Sjálfstæðisflokkurinn, Viðreisn og Samfylkingin eru núna með sjö fulltrúa af ellefu í bæjarstjórn Hafnarfjarðar.

Bæjarstjórastólnum kippt undan Framsókn

Fljótlega eftir kosningarnar 16. maí hófu Sjálfstæðisflokkurinn og Framsókn viðræður en eftir nokkra daga ákváðu Sjálfstæðismenn að slíta viðræðum við flokkinn. Vísuðu þeir þar til meints alvarlegs trúnaðarbrests. Hildur Rós Guðbjargardóttir, oddviti Samfylkingarinnar, útilokaði í kjölfarið samstarf við Framsókn. 

Bæjarstjórnarflokkur Sjálfstæðisflokksins vísaði til þess að Framsókn hefði handsalað samkomulag við aðra flokka um meirihlutaviðræður án vitneskju þeirra. Valdimar Víðisson, oddviti Framsóknar, og aðrir bæjarfulltrúar flokksins hafa alfarið hafnað því að þeir hafi gerst sekir um trúnaðarbrest. 

Orri Björnsson, oddviti Sjálfstæðisflokksins, hefur sagt að samningar hafi tekist um að Valdimar yrði næsti bæjarstjóri Hafnarfjarðar áður en viðræðum var slitið.

Oddvitar Sjálfstæðisflokksins, Viðreisnar og Samfylkingarinnar í Hafnarfirði tilkynntu á laugardag að þeir hefðu byrjað formlegar viðræður um meirihlutamyndun. Vinna við málefnasamning væri þegar hafin og stefnt að því að kynna hann á þriðjudag strax eftir hvítasunnuhelgi líkt og nú hefur verið boðað.

Fréttin hefur verið uppfærð.