Áttu ekki von á að þurfa að fara með málið fyrir dóm

Hópurinn vinnur að kvikmynd um ævi þjóðskáldsins og óskaði eftir að fá að grafa beinaleifar Jónasar upp í Þjóðargrafreitnum á Þingvöllum, taka úr þeim sýni og senda í DNA-greiningu. Beiðnin var send til Þingvallanefndar sem svaraði að nefndinni væri ekki heimilt að leyfa sýnatökuna án dómsúrskurðar. Í samtali við fréttastofu segir formaður nefndarinnar, Sigurður Helgi Pálmason þingmaður Flokks fólksins, að nefndin hafi ekki tekið afstöðu til beiðninnar þar sem dómsúrskurður lá ekki fyrir.

Fjölmiðlakonan Elín Hirst er hluti af hópnum sem óskaði eftir uppgreftrinum. Hún segir að vísindamaðurinn Matthías Þórðarson hafi farið á vegum stjórnvalda til Kaupmannahafnar árið 1946 þar sem bein Jónasar voru grafin upp og flutt til Íslands.

„Eftir þetta hafa verið stanslaust alls konar sögur á kreiki um það að Matthías hafi komið heim með röng bein og við teljum það mjög mikilvægt að eyða þessari óvissu núna þegar við getum gert það með DNA-greiningu,“ segir Elín Hirst í samtali við fréttastofu.

Jónas hafi legið í grafreit ásamt fleirum í Kaupmannahöfn. Elín segir hópinn ekki hafa átt von á að þurfa að fara með málið fyrir dóm en nú verði rætt við lögmann um hvernig málatilbúnaði verði háttað. Mikilvægt sé að leiða málið til lykta, Jónas og verk hans séu þjóðinni afar dýrmæt.

„Það voru íslensk stjórnvöld sem í raun og veru röskuðu grafarró Jónasar 1946, þannig að henni hefur verið raskað.“

Jón Viðar Jónsson bókmenntagagnrýnandi gagnrýndi fyrirætlanir hópsins í Facebook-færslu og sagði uppátækið vera auglýsingu fyrir kvikmyndina umræddu. 

Elín svarar þeirri gagnrýni og segir þau ekki hafa verið að flagga þessari ósk þeirra. „En núna þegar Þingvallanefnd sendi frá sér fundargerð á netið, þá náttúrulega fer þetta mál í fjölmiðla eins og verða vill og þannig bara virkar lýðræðið í landinu,“ segir hún.