Dæmdur í lífstíðarbann frá öllum NBA leikjum

Þegar tæpar sjö mínútur voru eftir í leiknum í gærkvöldi, sem Knicks unnu á endanum 95-105, hljóp áhorfandi inn á völlinn. Hann reyndi að ná Wembanyama á mynd en var snarlega stöðvaður af öryggisvörðum og vísað út úr húsi.

„Ég hef aldrei lent í þessu. Ég vissi ekki hvernig ég átti að haga mér. Þetta kom mér á óvart, nánast jafn mikið og þegar leðurblaka flaug inn á völlinn,“ sagði Wembanyama og vísaði þar til frægs atviks á fyrsta tímabili hans í deildinni.

Myndband sem þessi æsti áhorfandi tók má sjá hér fyrir neðan.

Maðurinn sem hljóp inn á völlinn og annar maður sem var í slagtogi með honum hafa nú verið dæmdir í lífstíðarbann frá öllum NBA leikjum og leikvöngum.

Wembanyama skoraði 26 stig og greip 12 fráköst, en hitti aðeins úr 6 af 21 skoti í tapi Spurs.

„Ég var lélegur,“ sagði Wembanyama eftir leik en hann fær tækifæri til að gera betur í næsta leik. Annað en áhorfendurnir tveir.