Óttast for­dæmið sem á­kvörðun ráð­herra setur um Baldur

Sveitarfélögin Stykkishólmur, Vesturbyggð og Reykhólahreppur hörmuðu og mótmæltu ákvörðun innviðaráðherra um að færa Breiðafjarðarferjuna Baldur úr siglingum á Breiðafirði í sameiginlegri ályktun í gær og sérstaklega því fordæmi sem ákvörðunin kann að skapa. Undir ályktunina skrifa einnig þau Gerður Björk Sveinsdóttir, bæjarstjóri Vesturbyggðar, og Kjartan Þór Ragnarsson, talsmaður sveitarstjórnar Reykhólahrepps.

„Okkur var bara tilkynnt fyrir þremur dögum að Baldur yrði tekinn úr siglingum í Breiðafirði og síðan hefur maður heyrt að ferjuleiðinni hafi verið falið að færa sínar bókanir til og tilkynna um afbókanir á mjög skömmum tíma, sem er auðvitað mjög óheppilegt fyrir alla aðila,“ segir Jakob Björgvin Sigríðarson Jakobsson, bæjarstjóri í Stykkishólmi.

Á meðan muni ferjan Særún sigla til Flateyjar á Breiðafirði í fjarveru Baldurs og tryggja þjónustu við samfélagið þar. Vísað var til mikilla anna í flutningum til og frá Vestmannaeyjum á næstunni og að þess vegna væri talið nauðsynlegt að varaskipið Baldur bættist við ferjuþjónustu til Eyja á þessu tímabili.

Særún anni ekki eftirspurn Baldurs

Jakob segir Særúnu farþegaskip sem sinni eyjasiglingum í Breiðafirði og því að engu leyti sambærilegt við Baldur.

„Þetta er skipið sem fer um Breiðafjörðinn og sýnir fólki náttúru og fuglalíf og fer í plóginn niður og dregur upp sjávarafurðir af botni Breiðafjarðar og gefur fólki víkingasushi,“ segir Jakob.

„Þetta er náttúrulega farþegaskip, mun minna farþegaskipt, það tekur um 100, 200 manns held ég en þetta hefur gríðarleg áhrif á alla þjónustu, flutning bíla, og ekki síst fyrir þá þjónustu sem Flatey þarf á að halda. Orkubú Vestfjarða er með framkvæmdir þarna í júnímánuði sem eru í hálfgerðu uppnámi og síðan þarf að koma vatni yfir og það er grásleppuvertíð í gangi.“

Vinnsla í uppnámi

Það sé verið að landa afla í Flatey sem sé fluttur til vinnslu í Stykkishólmi og það sé allt í uppnámi því farþegaskipið nái ekki að anna þessu.

„Ef við hefðum vitað þetta fyrr, fyrir fjórum vikum eða tveimur mánuðum, að þetta væri fyrirhugað, þá væri hægt að gera einhverjar ráðstafanir og undirbúa en núna er þetta bara að koma einn tveir og tólf og það er ekki búið að undirbúa neitt,“ segir hann og að það þurfi að breyta öllum ráðstöfunum varðandi uppbyggingu Orkubús Vestfjarða í júní því flutningar skerðist. Þetta séu ein dæmi um áhrifin af þessari ákvörðun.

„Við höfum fullan skilning og sýnum samstöðu með Vestmannaeyingum þegar Herjólfur er ekki starfræktur, ef hann fer í slipp og er óstarfhæfur, eins og samningar kveða á um.“

„En það er þetta þegar það er verið að taka skipið í siglingar, frá Breiðafirði, þegar það er verið að anna umframeftirspurn, þar drögum við línuna því það er ekki í samræmi við okkar samtal við ríkið.“

Samningurinn kveði á um að Baldur sé varaskip þegar Herjólfur sé ekki starfhæfur. Jakob segir sveitarstjóra á svæðinu óttast fordæmið sem þessi ákvörðun setur.

„Herjólfur er að sigla en það er bara verið að taka ákvörðun um að bæta Baldri við til að anna eftirspurn. Það er það sem við gerum athugasemdir við, og alvarlegar athugasemdir, og við viljum ekki að þetta sé fordæmi sem endurtekur sig.“

Megi ekki taka Baldur þegar eitthvað er í gangi annars staðar

Hann segir ráðherra meðvitaðan um þeirra afstöðu.

„En við höfum samt ekki fengið formlega svör frá ráðherra um að þetta muni ekki endurtaka sig með þessum hætti. Við viljum ekki að þetta endurtaki sig með þessum hætti, að bæði sé fyrirvarinn stuttur og að Baldur sé fluttur til að anna eftirspurn annars staðar á landinu, hvort sem það er Vestmannaeyjar eða eitthvað annað sérstakt að gerast, þá er Baldur tekinn úr í siglingum hérna af því að það er eitthvað að gerast í Grímsey í Vestmannaeyjum. Þar verðum við bara að draga línuna í sandinn. Við erum ekki að fara þangað með Baldur“