„Stað­reynd að matarkarfan mun lækka í verði“

„Vextir húsnæðislána á Íslandi eru níu til tíu prósent á meðan þeir eru þrjú til fjögur prósent á evrusvæðinu,“ sagði Pawel í eldhúsdagsumræðum sem fram fóru á Alþingi í kvöld.

Pawel segir að heimilin skuldi um 3000 milljarða í fasteignalánum. Varlega áætlað væru þetta því hundrað milljarðar króna á ári sem íslensk heimili væru nú að ofgreiða.

„Það er líka staðreynd að matarkarfan mun lækka í verði. Verð á matvælum lækkaði um fjórðung í Svíþjóð og Finnlandi þegar þau gengu í ESB. Niðurfelling tolla og aukin samkeppni skilaði sér beint til neytenda. Á Íslandi, sem valdi EES-leiðina, gerðist þetta ekki.“

Þetta hafi komið fram í skýrslu Hagfræðistofnunar.

 Nýr heimur vopnvæddra viðskipta

Pawel segir að nú þegar viðskipti hafi verið vopnvædd og ríki beiti tollum í pólitískum tilgangi sé vernd að sækja í viðskipta- og tollabandalag líkt og ESB.

„Við erum í NATO til að tryggja hernaðarlegar varnir okkar og við eigum að vera í Evrópusamstarfi til að tryggja þær efnahagslegu.“

Samningurinn svari spurningum

Pawel segir eðlilegar spurningar uppi um stærstu atvinnugreinar landsins í sambandi við aðild.

„Þeim spurningum verður ekki svarað nema með samningaviðræðum. Önnur lönd hafa samið um sérlausnir… Samningsstaðan er sterk og skilningur á aðstæðum okkar er sannarlega til staðar.“

„Við eigum því að láta á þetta reyna. Fyrir heimilin og fyrirtækin í landinu. Við skulum því ganga til þessa verkefnis hnarreist og stolt. Og þess vegna eigum við að segja já þann 29. ágúst.“