Magdeburg tapaði í undan­úr­slitum

Aldrei hafa fleiri mætt á leik í lokakeppni Meistaradeildar Evrópu þegar Magdeburg og Fuchse Berlin mættust í undanúrslitum í dag. Leikið var í Lanxess-höllinni í Þýskalandi þar sem yfir 20.000 áhorfendur voru mættir.

Berlínarliðið byrjaði leikinn sterkt en náði aldrei að stinga Magdeburg af sem náði að halda í við Gidsel og félaga. Munurinn fór aldrei í meira en þrjú mörk í fyrri hálfleik en Fuchse Berlin var að vinna með tveimur mörkum í hálfleik, 19-17.

Leikurinn heldur áfram með sama markamun þangað til Ómar Ingi Magnússon og Gísli Þorgeir Kristjánsson stíga upp hjá Magdeburg. Þeir ná góðum kafla og þegar fimmtán mínútur eru eftir af leiknum er Magdeburg loksins með forystu í leiknum.

Eftir að Magdeburg kemst yfir fer Dejan Milosavljev, markmaður Fuchse Berlin, í markið og ver hann tvö dauðafæri með glæsibrag. Vörslurnar slökktu á Magdeburg og eftir þær var aðeins eitt lið eftir á vellinum. Leikurinn endaði með fimm marka sigri Fuchse Berlin sem mætir annaðhvort Álaborg eða Barcelona í úrslitum á morgun.

Ómar Ingi var markahæstur í Magdeburg með níu mörk sem og Matthias Gidsel hjá Fuchse Berlin. Gísli Þorgeir var með fimm mörk og gaf fjórar stoðsendingar.